تحریک انصاف کو فنڈ دینے والے آصف چوہدری نے مریم نواز کے دعووں کو جھوٹ ثابت کردیا

کراچی: امریکا میں مقیم پاکستانی آصف چوہدری نے مریم نواز کے دعووں کو جھوٹ قرار دے دیا، انہوں نے کہا کہ مریم نواز کا یہ دعویٰ کہ پاکستان تحریک انصاف نے اسرائیل سے پیسے لیے بالکل بے بنیاد ہے۔

تفصیلات کے مطابق پاکستان تحریک انصاف کو فنڈ دینے والے پاکستانی نژاد امریکی شہری آصف چوہدری نے اے آر وائی نیوز کے پروگرام الیونتھ آور میں گفتگو کرتے ہوئے بتایا کہ وہ امریکا میں ایک فرم کے ایڈمنسٹریٹر ہیں۔

آصف چوہدری نے بتایا کہ سنہ 2012 میں عمران خان امریکا آئے تھے اور ان کے اعزاز میں ایک تقریب منعقد کی تھی۔ اس پروگرام کا ٹکٹ 200 ڈالرز تھا۔ آصف چوہدری کے مطابق اس وقت انہوں نے 200 ڈالرز کا ایک چیک پی ٹی آئی کو دیا تھا۔

آصف چوہدری کے مطابق وہ چیک فرم کا تھا تاہم وہ انہوں نے اپنی ذاتی رقم میں سے دیا تھا۔ اس کے علاوہ 250 ڈالر کا ایک چیک اور دیا تھا تاہم وہ ابھی تک کیش نہیں کیا گیا۔

انہوں نے کہا کہ بس یہی وہ رقم ہے جس پر مریم نواز اپنے جلسوں میں وزیر اعظم عمران خان پر الزام لگاتی ہیں کہ انہیں اسرائیل سے پیسے ملے۔

آصف چوہدری نے مزید کہا کہ مریم نواز کو پھر بھی تسلی نہ ہو تو ہم پیسے اکٹھے کر کے انہیں ٹکٹ بھجواتے ہیں وہ یہاں آئیں، اپنی مرضی کے ہوٹل میں قیام کریں، ہم انہیں اس فرم کا دورہ کروائیں گے وہ خود ہی ساری معلومات کرلیں۔

مسلم لیگ ن کی رہنما عظمیٰ بخاری آصف چوہدری کے جوابات پر سیخ پا ہوگئیں، انہوں نے آصف چوہدری کو بھی اسرائیل کا شہری قرار دے دیا اور ان کے تمام جوابات کو جھوٹ قرار دیا۔

The post تحریک انصاف کو فنڈ دینے والے آصف چوہدری نے مریم نواز کے دعووں کو جھوٹ ثابت کردیا appeared first on ARYNews.tv | Urdu - Har Lamha Bakhabar.

from پاکستان – ARYNews.tv | Urdu – Har Lamha Bakhabar https://ift.tt/3p3E1sd