نامناسب پلاننگ کی وجہ سے آدھا کراچی کچی آبادی پر مشتمل ہے، وزیراعظم

لاہور : وزیراعظم عمران خان نے کہا ہے کہ نامناسب پلاننگ کی وجہ سے آدھا کراچی کچی آبادی پرمشتمل ہے، ہم نے دیکھ لیا کہ ہمارا نظام طاقتور کو نہیں پکڑسکتا۔

پنجاب پیری اربن کم لاگت ہاؤسنگ منصوبے کی تقریب سے خطاب کرتے ہوئے وزیر اعظم نے کہا کہ ایلیٹ طبقے نے نظام کو اپنے قبضے میں لیا ہوا ہے، ماضی میں کسی حکمران نے ملک میں تعلیم پر توجہ نہیں دی،74سال میں ایک مخصوص طبقے نے پاکستان ہر حکمرانی کی۔

انہوں نے کہا کہ نامناسب پلاننگ کی وجہ سے آدھا کراچی کچی آبادی پرمشتمل ہے، کچی آبادی میں رشوت کے عوض گیس،بجلی ملتی ہے، ملک بھر میں ہاؤسنگ اسکیم منصوبے انقلاب کی شروعات ہے۔

وزیراعظم کا کہنا تھا کہ بھارت میں کورونا کی وجہ سے اسپتالوں کا جو حال ہے وہ سب دیکھ رہے ہیں وہاں لوگ سڑکوں پر کورونا سے مررہے ہیں، پاکستان بھی کورونا کی تیسری خطرناک لہر کا سامنا کررہے ہیں، اس لیے میں سب کو ماسک پہننے کی تاکید کرتا ہوں۔

انہوں نے کہا کہ جب انگریز چھوڑ کر گیا تب سرکاری اسپتالوں میں بہترین علاج ہوتا تھا، میں اور میری بہنیں ہم میو اسپتال میں پیدا ہوئے تھے، آہستہ آہستہ امیروں کیلئے پرائیویٹ اسپتال بن گئے امیروں اور غریبوں کے علاقے الگ ہوگئے۔

وزیراعظم عمران خان نے کہا کہ پاکستان کی تاریخ میں سیمنٹ کی فروخت کا ریکارڈ ٹوٹ گیا،اب تک کے اندازے مطابق گندم کی ریکارڈ پیداوار ہوئی، اس سال 11ارب روپے کسانوں کو اضافی ملا، ہم زراعت میں نئی ٹیکنالوجی لا رہے ہیں۔

انہوں نے کہا کہ جو قومیں ریاست مدینہ کے اصولوں پر چلیں گی وہ اوپر چلی جائیں گی، جو معاشرہ عام آدمی کو اوپر نہیں اٹھاتا وہ خود بھی اوپر نہیں اٹھتا، طاقتور کو قانون کے نیچے لانا ،غریب کو اوپر اٹھانا ریاست کی ذمہ داری ہے۔

The post نامناسب پلاننگ کی وجہ سے آدھا کراچی کچی آبادی پر مشتمل ہے، وزیراعظم appeared first on ARYNews.tv | Urdu - Har Lamha Bakhabar.

from پاکستان – ARYNews.tv | Urdu – Har Lamha Bakhabar https://ift.tt/2Rs3EHw